كتابات أخرى للكاتب على موقع الناس

الجمعة 4/12/ 2009

لقاء صحفي مع الحاج زعيبل زعيم قائمة شفط الشفاطة (5) عودة وهيب الحاج زعيبل كان حزينا لفشل قائمته ( شفط الشفاطة ) في الحصول على اي صوت في انتخابات المحافظات الماضية ، ويقول عن ذلك:( والعباس ما ظل حمّال ولا عربنجي ولا عطّال بطّال الا صوّت لقائمتي لكن الجماعة كلوا اصواتنه من هلفج لهل الفج ، وكالولي قائمتك ما حصلت ولا صوت .. طلعت حتى انه ما مصوّت لروحي !! ويكولون الأنتخابات نزيهه ). صار ديدن حاج زعيبل ترديد عبارة ( شيشيلهم .. شيشيلهم ) ليل نهار ولما طلبت منه ان لا يستسلم قال : ( استاد: ماكو فايدة، الشاص شاص، والحمل حمل .. لو يجي (العزير) هم ما يكدر يشلعهم، ذوله صاروا مافيات، فلوس العراق صفت بجيوبهم ، وفوكاهه تساندههم دول قوية، فشلون تريدني انا وامثالي نتقارش وياهم .؟! ). لقد قرر الحاج زعيبل اعتزال العمل السياسي بسبب يأسه من امكانية انقاذ العراق من المافيات المتحاصصة أو (المتماصصة ) على حد تعبيره ولذا فإنه رفض الادلاء بأي تصريح سياسي . وحتى عندما قررت ان احتال عليه وقلت له انني اطلب رأيه ليس بأعتباره (قطبا) سياسيا بل بأعتباره (عطبا) عاديا يراقب ما يجري حوله، رفض قائلا :(أستاد ماكو فايدة بالحجي.. الحجي ماكله الثور). غير ان الحاج زعيبل غيّر رأيه وقرر استئناف نشاطه السياسي لسببين احدهما سبب مباشر وهو تلقيه (ايميل) من النائبة (ميسون الدملوجي) التي يحلو له ان يسميها (الدملوجه) تعاتبه فيه على استغراقه في الحزن واليأس. اما السبب غير المباشر فهو تدافع الاحزاب والكتل السياسيه على بيته ،ويقول عن هذا التدافع : ( يا أستاد هلأيام صرت كلش عزيز عد قوائم الشفاطة .. يوميه وجايني وفد شكل، يوم لابسين جراويات يوم لابسين عمايم يوم افندية وكلهم يريدوني اتحالف وياهم.. كتلهم عمي جا اذا كل احنه نصير بقائمة وحدة جا ليش انسوي انتخابات؟ كالوا نريد نصير كتله وحده حتى لا تضيع اصوات الناخبين !! كتلهم : خل تضيع اصوات الناخبين (ضيعة عين عودة) ، جا اصوات الناخبين احسن من فلوس النفط اللي شفطتوهه .. عمي ،انتم ما خايفين اتضيع اصوات الناخبين، انتم خايفين انتم نفسكم تضيعون .. تعرفون الناس جرّبتكم وعرفت دماراتكم وما راح تنتخبكم، فتريدون تلبدون بسد حاج زعيبل وغيره ) الهلع الذي تعيشه قوائم الشفاطه وتحفز ابناء الشعب لرميهم في اقرب (حديقة) من(حدايق) التاريخ زرع الامل في نفس حاج زعيبل وقرر ان يعيد تشكيل قائمته السابقة (قائمة شفط الشفاطة) وان ينزل الى الساحة بقوة، ووافق على اعطائي حديثا صحفيا مطولا سننشره على حلقات. الحلقة الخامسة الفرق بين الوطني والبعثي بعد سقوط النظام الصدامي مارس العراقيون شيئا جديدا لم يألفوه سابقا وهو نقد الحكومة... قبل قبر النظام (في مزبلة التأريخ) كان نقد الحكومة يساوي الكفر او كما يقول حاج زعيبل : - عمي الله وكيلك جان الامن والاستخبارات والحزب عدهم صدام اهم من الله ، اللي يحجي على صدام اعدام ،لكن اللي يكفر محد يسويله شي الا اذا جان مو بعثي ويدورون عليه زلّه ، بهل الحاله الله يصير كلش عزيز عد البعثيه ، لكن اذا بعثي يكفر يسوونهه وياه مثل ماسوه ذاك الشيخ من ابنه (خلف) اعتدى على عرض (صبحه ) بنت الفلاح... الفلاح ابو صبحه راح للشيخ وحب ايده وكاله : ( يمحفوظ .. المحروس ابنك خلف حبّل بتي صبحه...) الشيخ صفطه بغمّه وكاله : ( امّداك على هل الراي ..ولك ياخبل تعتب على خلف الياهل... ولك خلف ياهل - جاهل- ما ينعتب عليه ، اشمالك مخبل).... بعد قبر النظام وتشييعه الى مثواه الاخير( في جهنم) صارت الحكومة على حد تعبير الحاج زعيبل ( ملطشه للي يسوه والمايسوه..الزين والشين يحجي على الحكومة ، الوطنيين والبعثيين اثنيناتهم يحجون على الحكومة ).. عندها اختلطت الاوراق وصار من الصعب التمييز بين من يحاول الهدم او يحاول الاصلاح . وقد استغلت الحكومة واحزابها هذه الحالة فصارت تصف كل منتقد لأخطائها وخطاياها بالبعثي للهروب من عملية الاصلاح التي حلم بها ابناء العراق.. لذا توجهت بالسؤال الى حاج زعيبل - اولا كيف نميز بين الوطني وبين البعثي - وداعتك القضية اتصير كلش سهله اذا عرفنه بان شغلة البعثي هي مو شغلة انتماء لحزب البعث ، الناس ثلث ترباعهه (اذا مو كلهه) صارت بعثيه، لان اللي ما يصير بعثي ما اله عيشه بالعراق، لكن البعثيه القرص (الحقيقيين) تكدر تعدهم على اصابع ايدك . فالبعثية مو شغلة انتماء ، مو كلمن انتمه لحزب البعث صار بعثي ... البعثيه صارت (مثل) لكلشي مزين ، وحالهه حال اي مثل .. المثل ينكال على كل واحد يصح عليه المثل.. فكل واحد يسوي مثل ماجانوا البعثيين يسوون فهذا بعثي... مثلا اللي يبوك اموال الدولة هذا بعثي المرتشي بعثي الانتهازي بعثي اللي يفضل مصلحة حزبه على مصلحة العراق هذا بعثي اللي يعين جماعته واقاربه ويعوف الناس اللي تفتهم هذا بعثي اللي ينطي اشارة (لليسار) ويمشي (يمين) هذا بعثي اللي يزوّر الانتخابات هذا بعثي اللي يتملق للمسؤولين حتى يحصله لحسه هذا بعثي - ياحاج زعيبل ، اذا على هاي الحسبه يطلع نص المسؤولين بعثيه - العلم عد الله ايجوز اكثر، بس انا اكلك : أي واحد يسوي مثل البعثيين هو بعثي سواء جان بحزب الدعوة ، بالوفاق، بحزب الله ، بحزب عبد الله ، بالمجلس ، بالمضيف ، بالفضلاء ، بالسيبنديه ، بالحزب الشيوعي ماكو فرق .. الوطني هو اللي يرفض البعث ( كول وفعل ) مو بس حجي ، لان بالحجي كلهه وطنيه ( والحمد لله ) - الكل ينتقد الاداء الحكومي. فماهو الفرق بين نقد الوطنيين وبين نقد البعثيين - الوطني من يشوف الحكومه تخطا يتألم ويتأسف ويتمنه ما تصير هيجي اخطاء، لكن البعثي يفرح من تخطا الحكومة حتى يتشمت بيهه وحتى يهدمهه.. البعثي يترزق على اخطاء الحكومة ، عيشته على اخطاء الحكومه ، لكن الوطني يخسر خسارة جبيره من تخطا الحكومة لان الخسران هو الوطن. الوطني يريد يبني ، والبعثي يريد يهدم حتى يفرهد - ولكن كيف لنا ان نميز بين نقد الوطنيين ونقد البعثيين؟ مثلا الكل ينتقد المحاصصة فكيف نصنف النقاد؟ كيف نقول هذا نقد وطني وهذا نقد بعثي اذا كان مضمون النقد واحد؟ - بهاي الك حك . كلش صعبه ، وان كان مرات نكدر نميز اذا احنه نعرف الشخص معرفه تامه . بس احنه انكول: هي الحكومه ليش تسوي اخطاء وتخلي الوادم تشتم بيهه ؟ هل الحكومة غشيمه وما تعرف الزين من الشين لو متقصده اتاذي الناس؟ ليش ما تجر عدل وتخلي الوطنيين يدافعون عنهه ويحمونهه ؟ ليش اتسوي مثل ماجان البعثيين ايسوون وبعدين تتهم اللي ينتقدونهه وتكول عنهم بعثية ؟ مو يكولون رحم الله والديه اللي يبعد الغيبه عن روحه .. جاهمه ايسوون مكسوره ورا مكسوره ويريدونه نسكت ؟! ايكولون اكو (والي) بالبصرة سمع بان القاضي يعض المتهمين اللي يحاكمهم. الوالي ودّه على القاضي وسأله عن هاي الدعاية القاضي كاله : اللي سمعته صحيح،بصراحه انا اعض، واذا تريد تعال للمحكمه وشوفني اشلون اعض الوالي راح وي القاضي للمحكمه اجه المتهم والمشتكي القاضي كال للمتهم : فلان يدّعي بانه يطلبك مية دينار المتهم : صح وانا ما ناكر القاضي :جا ليش ما تسدد الدين المتهم : ماعندي القاضي : بس المشتكي يكول انت عندك هوايش وعندك غنم وعندك بستان نخل وعندك بيت ملك المتهم : صح سيدي ذني كلهن عندي، بس ذني رزق عيالي وما اكدر ابيعهن واوفي الدين القاضي : طيب ، راح اقصطهن عليك، اسويهن كل شهر عشر دنانير المتهم : ما اكدر، ماعندي القاضي : طيب انسويهن بالشهر خمسة دنانير المتهم : ما اكدر ماعندي القاضي : زين يابه انسويهن دينار بالشهر المتهم : سيدي ما اكدر .. منين اجيب الدينار الوالي طكت روحه وكال للقاضي : اذا ما تكوم اتعض(هلمنعول الوالدين) انا هسه اكوم واعضه واكطم اذاناته فعاد (الجماعة) يخلونه كوه كوه انعضهم .. حتى اذا البعثيه ماعضوهم هم احنه اتطك ارواحتنه من سوالفهم الفاينه ونعضهم . وللحديث بقية ¤ لقاء صحفي مع الحاج زعيبل زعيم قائمة شفط الشفاطة (4) ¤ لقاء صحفي مع الحاج زعيبل زعيم قائمة شفط الشفاطة (3) ¤ لقاء صحفي مع الحاج زعيبل زعيم قائمة شفط الشفاطة (2) ¤ لقاء صحفي مع الحاج زعيبل زعيم قائمة شفط الشفاطة (1)