|  الناس  |  المقالات  |  الثقافية  |  ذكريات  |  المكتبة  |  كتّاب الناس  |
		الثلاثاء  19 / 8 / 2014                                                العيداني مصطفى                                          كتابات أخرى للكاتب على موقع الناس
		جيش اللوكية العيداني مصطفى انتهت حقبة زمنية (حلو مصطلح حقبة) قادها المالكي ثماني سنوات بحلوها (اذا جان بيها حلو) ومرها تجرعنا فيها العديد من الارهاصات (هذا هم مصطلح جديد بعد شتردون) والكثير من الهفوات والمغالطات التي أثرت بنا كثيرا وجعلتنا نتراجع بشكل ملفت للنظر الى الوراء . اليوم وبعد ان اعلن (السيد الريس) عن انسحابه (رغماً عنه) (لأن هو ناوي ما ينطيها) لكن بسبب ضغوطات المرجعية التي تحدثت كثيرا بهذا الموضوع ولما وصل الحال ببلدنا هذا اليوم لا يمكن ان نتشمت به كونه رئيس وزراء سابق انتقدناه كثيراً (وحجينا وياه شكد بس كون يستفاد من النصيحة) لكن فات الاوان ..!!!! المشكلة هنا تكمن (يعني توكف) عند جيش المنافقين الذين تجيشوا سواء برغباتهم كونهم يحبون الذلة والتملق او أناس جيّشهم المالكي بنفسه حتى (يتلوكون) بأي طريقة من (جماعة) (تاج راسك ابو اسراء) العديد من الصحفيين والكتاب والقنوات والوجهاء (ومخربطين شكد) اين سيذهبون اليوم (ووين يرحون يذبون ضيمهم) جيش كبير تركه "المالكي" دون ان يعي اين سيذهب (يتاماه) لا بد من تخصيص (راتب تقاعدي يفيدهم شوي) لأن هم محتارين من (الاسبوع الفات) ومن ضمن ما قاله الرئيس السابق (في خطبة الوداع) بأن هناك متطوعين وقيادات امنية ستنسحب في حال عدم حصول سيدهم على (الطركاعة الثالثة) نتساءل هل اصبح العراق والدفاع عنه وعن ترابه مرتبط بمصير شخص يذهب مع ادراج الرايح ام ماذا... (ليش تصيرون لوكية يعني شنو تستفادون ) يمعودين (الطاغية صدام 35 سنة يصبغون بيه اللوكية لحد ما بهذل الشعب ..اتعظوا وتعلموا.) النصيحة التي يجب ان يتعلموا منها (ولو هو اللي متعلم على الذلة والاهانة والتعبد للمسؤول) (ما يتعلم ) عليكم ان لا تندفعوا مرة اخرى وتسجلوا اسماءكم في سجلات (لوكية العبادي) او الحاشية التي تريد ان تعمل منذ الان تحت خيمة الرئيس الجديد (الدنيا دوارة) ولا تعبدوا الاشخاص (لانهم بمرور الزمن (ينكسحون) والعراق وحده يبقى فكلهم يمضون ناهيك عن (تملق السياسيين العجيب) من المتحدثات (حديثات العهد السياسي) كل (وحدة لسانها شطوله!!) والكثير من اللوكية لا اعتقد سيطأطئون (اللي يفهم هذا المصطلح ينطي لايك) رؤوسهم كونهم يفرحون للعبودية .. بأنتظار الاربع سنوات القادمة نبتدأ معها ونحن نحاول ان نقوّم السلبيات من خلال ما نراه مناسبا لمجتمعنا يا سادة يا مسؤولين . رباط السالفة : يا لوكي ليش توط وط مو اللي شال صدام برمشة عين يشيل المالكي وعشرة من امثاله .
	Since 17/01/05.  web counter