حسين جهيد الحافظ
 

 

برعم فهد

حسين جهيد الحافظ
noh_alhafz@yahoo.com

1-
فهد بويه
برعمك ذاك الشتلته ......
......ابفي حديقتنه الزغيره
خضرن ورداته غيره
أتفوح هيل......أتفوح ياس
رسمت أفكارك درب
وصرنه محبوب ومحب
( أقوى امن الموت.......
.....وأعله امن المشانق)
فاضت أشواطي بنفسج
عانكت شوك السحب
لافتة حب ومحنه.....كتبت اتراب الوطن
لليريد الخير.....مسموح اليطب
وانرسم حبك درب

2-
فهد بويه
برعمك ذاك الشتلته
فتحن ورداته جوري......
......اتباهه ابحبه العراق
طيف يعيون الرفاق
أشما تزيد الظلمه...........
.......يتلالن شهب
صار للوادم درب

3-
فهد بويه برعمك ذاك الشتلته
هيبه بعيون الزلم.....
وشوك من دمك سكيته
كبر بينه......
...كبر كفوين ونعم
صار شجره وفيهه دنيه
امن الحرب خضر سلم
اشكثر رادوا.....
....بويه ايبوكون من عنده الضوه
واشكثر واشكد تمنوا عنه ايسدون شباج الهوه
عجزوا وملت حيلهم
وهو بالحب......
.........صار للوادم دوه
صار فرحه كحله بعيون اليحب
وصارن افكارك درب

4 -
فهد بويه
برعمك ذاك الشتلته
خضر ابحبنه حديقه
كل غصن فنح رفيق.....
.....وبيه كل ورده رفيقه
وانكتب دمك شهاده
طرزت دنيه الحقيقة
أبكل كتر من عدهه عيد
(وطن حر.......
....كرنفال وبيه تتباهه السوالف
والشعب شعب سعيد)
اتعلت الهام الثريه......
......وسهلت كل شي صعب
امعبد ابدم الشهاده
رسمت افكارك درب

5-
فهد بويه
برعمك ذاك الشتلته
برعم ابفي الضفاير
كبر بينه .....طكن أوراقه مشاعر
كل غصن خضر قصيده
كل سطر من عدهه شاعر
ماحجه غير الحقيقه..
........وما عرف يوم الجذب
حزنه صوته....عانك ابشوك الشهب
درب حزبك فهد بويه
صار للوادم درب.....
.......صارللدنيه درب