|  الناس  |  المقالات  |  الثقافية  |  ذكريات  |  المكتبة  |  كتّاب الناس  |
 

     
 

الخميس  31  / 3  / 2016                                   كامل الركابي                        كتابات أخرى للكاتب على موقع الناس

 
 

 

العراقيات

كامل الركابي
(موقع الناس)


 

العراقيات
الجميلات
رابيات بعز اهلهن
رافعات بروسهن
للسمه
طير
وشامخات
النازلات بكل عذوبة
ماي دجله
وماليات
السوگ بالهمسات
خضرة
وعاشگات
من الاغاني الترفه
ذيچ البيها حب
وبيها نغمه
وع الأمل مطرح مخده
وغافيات
العراقيات الجميلات
بنات الثانويه
القاريات
كتب
موبس كتبهن
مدرسيه
عن مدارات الحلم والثوره
والحب والرفض
عن العشق
عن نيرودا
واشعاره
عن
جيفارا
رَسِم
مو عالقميص
الرسم بالروح الزغيره
النافره
بطاقه فتيه وساهرات
عيونهن مشهد مجرّه
وضاويات
وغفله
مدري
اشسلط من الهم عليهن
ريح وحشيه
طحن بالدم
جراحات
العراقيات الجميلات
النبيلات
الشايلات
ابشيلتهن
السوده
العذابات
امبسّطات
وبايعات الدوه
وباكيت الجگاير
بالغريبه من الشوارع
من صبح
والليل ملتحفات
من برد الرصيف
ناضحات الخوف والحرمان
وإدمان الخسارة
وعمر يتلفت مسافه
ع البعيد
ومايطل غير الخريف
الشاحب
العاشگ
صفار الشاحبات
النادبات
الهايلات
تراب فوگ اخدودهن
بصدورهن
حزن السنين الموحشات
البايعات
الملح من صبخة بعيدة
اللبن من اهوار
تنشف
الخضرة
من بستان غارگ بالسواد
السمچ
من اشطوط تلهث من عطش
التمر
من نخلات ظلن عازبات
الماي مج
ينضح ملح
بايعات بلا خساره
وطالعات بلا ربح
لاعلى اشفايفهن أتفتح ورود
ياورود اتشوف
كل شفه جرح
الارملات
الفاقدات
الأمل والحب والاراده
الناقمات اعلى الشهاده
الناذرات
أعمارهن كلها على لحظة ولادة
الجميلات
العراقيات
مغدورات
داده !
 

 

 

 

 

 Since 17/01/05. 
free web counter
web counter