|  الناس  |  المقالات  |  الثقافية  |  ذكريات  |  المكتبة  |  كتّاب الناس  |
 

     
 

الخميس  28  / 6 / 2018                       د. مؤيد عبد الستار                            كتابات أخرى للكاتب على موقع الناس

 
 

 

جاسمية تتوعد ابو جاسم : ماطول كَهوة وتتن

د. مؤيد عبد الستار
(موقع الناس)

مشهد تمثيلي
* ايــه .. مسعدة وبيتج على الشط ...
- ها ابو جويسم هو اني المسعدة لو ربعك اللي يعبون بالصناديك ركي
* ما تكليلي ليش يعبون ركي .. قابل عدهم سكلة مال باب السيف
- اي غشم روحك .. سكلة باب السيف .. لا سكلة باب الهوى
* هسة ما علينا .. شنو سالفة الركَي
- الركَي مال ربعك .. الفرهدوه ويه صناديك الانتخابات
* انتي ما تجوزين من صناديك الانتخابات .. مو حركتيهن حرك .. ما عندج غير سالفة
- والله ما جوز منكم الا آخذ حقي
* ومنو الماخذ حقج يابه .. انشاالله احنه
- اي انت ومجلوب السلف .. شلون تاخذ البطاقة مالتي وتزورهَ
* انه لا مزورهَ ولا شي .. هو انتي اللي ضيعتيهَ
- لا .. ما ضيعتهَ .. انه ضامتهَ بصندوك العرس اللي فرهدته
* عفيه صندوك العرس .. شنو مغارة علي بابا .. كلشي بيه
- ما لي شغل .. انه سجلت شكاية عند مكتب المفوضية .. اريد حقي
* المفوضية تريد اثباتات .. مو كَوتره .. مو علوة ركي ، حمّـل وشيل والله وياك عبوسي
- عندي اثباتات .. عبالك انه غشيمه
* شنو يابه اثباتاتج .. عندج شهود ؟
- السالفة ما ينرادلها شهود .. منو بايع بطاقتي الانتخابية يطلعون اسمه ويقدموه للمحكمة
* يا معوده .. هاي سالفة وجعانه .. يا محكمة .. يا شهود .. كلشي ما يسوون
- انا ما جوز .. لازم اطلع حقي من حلوك الحرامية
* هسة هو صوتج قابل راح يغير الحكومة .. يصعد ينزل هو صوت بيس نفر لايزيد ولا ينكص
- انت عندك لا يزيد ولا ينكص .. انا صوتي ما اتساهل بيه
* خوش ده خلي يربح صويحبنا مجلوب السلف وانا ارد الج القاط قاطين .. اجيبلج عباية بريسم
- خليهَ على حالك .. عبايه بريسم ، لازم الصندوك اللي بي بطاقتي المزورة يبطل من الحساب ويردون يحسبوه من جده وجديد
* يابه انتي صدك تحجين .. جذب .. ماتدرين الصناديك احتركت وصارت تتن .
- الصناديك احتركت .. لكن الاوراق والدفاتر ما محروكة .. عدهم بالمفوضية
* اش مدريج .. قابل انتي بالمفوضية لو بالشرطة ... همه كالوا احتركت وكلشي انتهى
- شوف ابو جويسم ، ما طول انه موجوده اطلع البوكه .. ومثل ما يكولون: ماطول كَهوة وتتن / كل الامور تهون .

 

 

 

 

 

 

          موقع الناس .. موقع لكل العراقيين /  ديمقراطي .. تقدمي .. علماني

             جميع حقـوق الطبع والنشر محفوظة لموقع الناس                                                              Copyright © 2005-2012 al-nnas.com - All rights reserved         

  Since 17/01/05. 
free web counter
web counter