| الناس | الثقافية |  وثائق |  ذكريات | صحف | مواقع | للاتصال بنا |

موقع الناس .. ملتقى لكل العراقيين /  ديمقراطي .. تقدمي .. علماني

 

 

مقالات وآراء حرة

 

 

 

 

السبت 8/12/ 2007

 

البرلماني العراقي
4

احمد الزبيدي - طشقند

البرلماني العراقي له حصانه
كل برلماني عراقي له حصانه ؟؟ وهذا يعني سيدي المواطن البرلماني يملك حصان يأتي به الى البرلمان ويعود به الى بيته وبالعربي الفصيح البرلماني يصبح اعلى من الاخرين لانه له حصان يركبه وفي حالة اخذ الحصان منه يرجع ويصبح مواطنا عاديا حاله حال الخلك يمشي على رجليه ويستطيع كل واحد يكفخه ولذلك ترى البرلماني دائما مجلب بمكانه و بحصانه ولوما حصانه جان كدرت المحاكم تحاكمه وتسجنه لكن صاحبنه عنده حصان اللي ما تلحك بيه لا شرطه ولا محاكم . والبرلماني من يلزم حصانه يكوم يشيل عليه كلشي ومحد يكدر يفتشه ولا واحد يكدر يوكفه وتشوفه مسوي الحدود خري مري .. ها .. وخلي يجرب واحد يكله اوكف واذا بحصانه يكوم يرافس ويزاكط وما يخلي شي ما يكسره وتشوف البرلماني يطالب دائما بتعليف حصانه لانه ضعيف ويجب تسمينه لانه ما يكدر يشيل عليه هواي غراض وبعدين حصانه يروح هدر....... وتشوفه دائما يهدد تره ابطل من البرلمان وتصير عليكم جهنم لانه انزع السدارة والبس عكال واتحاضن ويه حارث الضاري ديروا بالكم عليه وانطوني افلوس اكثر حته اشبع احصاني واني حتى اذا سافرت للخارج فحصاني وياي وينرادله حشم وخدم ... بس ياجماعه اني مرات اتعجب اشلون برلماني يعيش بدول الجوار ويكضي كل وكته بأوربا وياه حصانه موو هذا الحصان عراقي وخاص بالبرلمان ومرات اسأل نفسي ليش ما البرلمان يسحب حصانه من البرلماني العايش بره وملتهي بالمكسرات والانكس من هذي البرلماني اللي بالداخل يستعمل حصانه لنقل متفجرات واسلحه ومن يسألوه يكول والله هذني مو مالاتي يابه يكلوله مو ايديك وايدين ولدك بيها اثار السلاح والبارود يكول والله اي صحيح لانه احنه لكيناهن على الحصان ولعبنه بيهن وظلينه ننتظر حتى نعرف منو اللي خلاهن ونسلمه للقوات متعددة الجنسية لانه احنه ما انأمن بالشرطة والجيش العراقي لانها مخترقة من قبل اعداء الشعب وعلى هالرنه طحينج ناعم .
ومره اجو جماعه واشتكو عند رئيس البرلمان وكلوله واحد برلماني هو وحصانه كتلو واحد ففكر زين الريس وكال صحيح بس هذي الحالة دفاع عن النفس لانه البرلماني وحصانه شافو واحد هدومه وصخه ومشككه وراد يوكفهم فالحصان اخترع اتوقع هذا وحش كاسر فهجم عليه ونعنع اضلوعه وموته وهذه الحاله تعتبر دفاع عن النفس ... على كل مواطنينا الاعزاء ، ما النه الا ان ننزل البرلماني من حصانه وناخذه منه حتى يصير واحد من عدنه واذا شفناه كام يلوص نشبعه نعل ماركة ابو تحسين بس هذا الوكت ينرادله صبر والصبر مفتاح الفرج وافهمها واقرا الكلمة الاخيرة كما يحلو لك .

 

¤ البرلمان العراقي 3

¤ البرلمان العراقي 2

¤ البرلمان العراقي 1

Counters

 

أرشيف المقالات